كتير مننا بيبدأ مستعجل وعايز يخلص اجراءات تأسيس شركته في يومين، بس المشكلة انه بيعتمد في ده على انه يوكل مكتب محاماه او محاسب قانوني يعمله إجراءات التأسيس. وفعلا ده اللي بيحصل بس بعد كام شهر تبدأ المشاكل القانونية تظهر والدنيا تقف!
في المقال ده هنوضحلك أهم 3 أخطاء لازم تاخد بالك منها وانت بتأسس شركتك..
الخطأ الأول: التأسيس بدون مقر
ده خطأ شائع في مجال تأسيس الشركات وللأسف كتير من الاعلانات اللي هتشوفها على السوشيال ميديا هتلاقيها بتقولك (تأسيس بدون مقر) وفي واقع الأمر فعلاً تقدر تأسس بدون مقر بس هتواجهك المشاكل القانونية بعدين وهتخسرك فلوس ووقت أنت في غنى عنهم.
خلينا نوضحلك النقطة دي…
مبدئيا مفيش شركة من غير عنوان مقر .. حاجة زي البطاقة الشخصية كده، مش ممكن تطلع من غير عنوان صاحب البطاقة الشخصية.
طيب ليه فيه اعلانات بتقول (نأسس لك شركتك بدون مقر)؟
ركز معانا…
لو انت مقرر تأسس شركة (الشخص الواحد أو مسئولية محدودة او مساهمة) عقد الايجار مش بيكون من الأوراق المطلوبة لتأسيس الشركة ولكن بيطلب منك تحديد عنوان كمقر للشركة ( يعني ورقة عقد الإيجار مش هيسألك عليها بس هيطلب منك عنوان للشركة بدون إثبات ).
فبالتالي هتلاقي البعض بيستغل النقطة دي ويقترح عليك عنوان وهمي او عنوان بيتك ويمكن يعملهولك على عنوان مكتب المحاماه الخاص بيه.
طيب ايه المخاطر اللي شركتك ممكن تتعرض لها بعد التأسيس؟
أول حاجة مش هتعرف تفتح ملف تأميني للشركة لأن بيتطلب عقد إيجار مثبت التاريخ، ودلوقتي الغرامات بقت كبيرة لو مفتحتش ملف تأميني للشركة.
تاني حاجة هتجيلك معاينات ضريبية بعد سنة من تاريخ التأسيس وهتضطر تاخد مقر خاص بيك حتى لو غرفة مكتبية.
وعلشان تحل المشكلة دي هتضطر تعمل جمعية عمومية غير عادية هتاخد وقت حوالي شهر بالاضافة انها هتكلفك حوالي من 4000 إلى 6000 جنيه رسوم واتعاب على أقل رأس مال – وده ليه؟! علشان بس تعدل العنوان في السجل التجاري والبطاقة الضريبية وعقد تأسيس الشركة. ( أكيد كده وضح لك التلاعب في النقطة دي وهتلاقي نفسك دفعت مبلغ أكبر من المتفق عليه في الأول وكمان خسرت وقت ووجع دماغ أنت في غنى عنهم ).
الخطأ الثاني: عدم اختيار مراقب الحسابات
في شركات الشخص الواحد والمسئولية المحدودة والمساهمة يوجد متطلب أساسي عند التأسيس هو انك تعين مراقب حسابات، ليه مهام محددة في الشركة. ( تقدر تعمل بحث على الانترنت وتعرف اكتر عن دور مراقب الحسابات في شركتك ).
كتير من الشركات بتبدأ نشاطها من غير ما تكون مختارة مراقب الحسابات بنفسها، ممكن تبدأ وبعد فترة تكتشف ان المحامي اللي اسس لك الشركة اختار مراقب حسابات وانت مش عارف، وفي الاخر هو سلمك السجل التجاري والبطاقة الضريبية وبعد كده لما تقابلك اي مشكلة او محتاج تعمل اي اجراء في الشركة زي مثلا تضيف شركاء جدد او تخرج شركاء او تغير اسم الشركة على سبيل المثال، هتلاقي اي اجراء من ده بيحتاج تعمل جمعية عمومية غير عادية وتتفاجأ ان لازم الجمعية يحضرها مراقب الحسابات ويعتمدها ويختمها. ودور أنت بقى على مراقب الحسابات؟!
بننصح في قانوني انك تختار مراقب الحسابات بنفسك وتعرف بالظبط ايه هو نطاق الأعمال اللي هيمارسه في شركتك وتتفق معاه على اتعابه ومهامه بشكل مكتوب.
الخطأ الثالث: اتخاذ القرار بدون عمل استشارات
في سمة كده بتجمع معظم رواد الاعمال واصحاب البزنس هي انه بيحب يدور ويعمل search كويس على كل حاجة بس تيجي عند الجزء القانوني ويقولك لأ مليش انا في الكلام ده!
وده اكبر خطأ! لازم تكون فاهم وانت بتوكل أي محامي او مكتب محاماه، مينفعش تعتمد على حد، لازم تعمل search كتير! وتسأل كتير! وتعمل استشارات مع اكتر من حد علشان تتطمن خصوصا في خطوة تأسيس الشركة.
وعلشان تعرف خطورة عدم عمل استشارات خلينا نحكيلك القصة دي اللي بالفعل حصلت مع أحد عملائنا!
في 3 اشخاص قرروا يأسسوا شركة ذات مسئولية محدودة، نشاط شركتهم كان برمجيات، وقرروا يكون اسم شركتهم (سوفت بلانز لنظم البرمجيات والاستشارات التقنية).
وفي تحديد النشاط قالوا نضيف نشاط الاستشارات مع انهم كانوا بيقدموا فقط حلول برمجية يعني مفيش عندهم استشارات خالص بيقدموها.. بس تقريبا هما عجبهم الاسم، وراحوا أسسوا الشركة وضافوا لنشاط البرمجيات نشاط اضافي اللي هو الاستشارات.
بعد ما خلصوا كل اجراءات التأسيس اتفاجأوا ان نشاط الاستشارات خاضع لضريبة القيمة المضافة من DAY 1، وبالتالي هيدفعوا على أي فواتير بتطلع ضريبة قيمة مضافة رغم انهم مش بيقدموا نشاط الاستشارات.
بعد دوخة كبيرة مكنش قدامهم حل غير انهم يعملوا جمعية عمومية غير عادية ويعدلوا نشاط شركتهم ويخلوه برمجيات software فقط ويشيلوا نشاط الاستشارات، و ده اللي هما اصلا مش بيشتغلوا فيه.
الحل ده كلفهم تقريبا 4500 جنيه كرسوم، ده غير ان الجمعية خدت تقريبا شهر، وشركتهم اتعطلت وقت واتكلفت فلوس.
ده غير ان المكتب اللي كان مأسس لهم الشركة اسسها على قانون 159 مع ان من الافضل كان يأسس على قانون 72 ويتمتع بحوافز الاستثمار والإعفاء من غرفة صناعة تكنولوجيا المعلومات اللي بتكون تكلفتها سنويا تقريبا 2228 جنيه.
كل ده بسبب انهم معملوش استشارة ومسألوش كويس قبل ما يتحركوا.
في قانوني.كو بننصح دايما لو كنت هتأسس شركتك بنفسك تسأل كتير وتاخد رأي ناس متخصصين.
وافضل مكان تسأل فيه خدمة عملاء الهيئة العامة للاستثمار علشان القوانين كل يوم فيها جديد والافضل انك تسأل وتفكر كويس علشان متعطلش شركتك.
احنا في قانوني.كو بنقدم استشارات مجانية بخصوص تأسيس الشركات، يعني لو حابب تأسس شركتك بنفسك أو حابب تخلي قانوني.كو تأسس لك شركتك، فأنت محتاج تحجز استشارة مجانية مع محامي تأسيس الشركات في قانوني.كو وتعرف ايه هي الإجراءات والقوانين والرسوم الكلية لتأسيس شركتك.
تقدر تسأل قانوني.كو وهنرد عليك بكل التفاصيل.
